നികുതിച്ചോര്‍ച്ച

ധനവിചാരം, മാതൃഭൂമി ഒക്ടോബര്‍ 16, 2014

എത്ര കിണഞ്ഞു പരിശ്രമിച്ചാലും വര്‍ഷാവസാനത്തെ ഓവര്‍ഡ്രാഫ്റ്റ് കുറയ്ക്കാമെന്നല്ലാതെ ഇല്ലാതാക്കാനാവില്ല. ഇനി ആയിരം കോടി രൂപ വരെ കാഷ് ബാലന്‍സ് ഉണ്ടെങ്കിലും ഏപ്രില്‍ ആദ്യവാരം

ട്രഷറി അടച്ചുപൂട്ടേണ്ടിവരും എന്നാണ് ധനവകുപ്പിന്റെ നിഗമനം

ഇക്കണക്കിന് പോയാല്‍ പുതിയ ധനകാര്യവര്‍ഷം ആരംഭിക്കുന്ന ഏപ്രില്‍ ഒന്നിന് ഖജനാവിന്റെ സ്ഥിതി എന്തായിരിക്കും? കഴിഞ്ഞ മൂന്ന് ദിവസങ്ങളിലായി മാതൃഭൂമി പ്രസിദ്ധീകരിച്ച 'ഖജനാവ് കാലി, വികസനം കിനാവ്' എന്ന പരമ്പരയില്‍ ആ ചോദ്യത്തിനുള്ള ഉത്തരമുണ്ട്. 6,603 കോടി രൂപയുടെ ഓവര്‍ ഡ്രാഫ്‌റ്റോടെയായിരിക്കും പുതിയ ധനകാര്യവര്‍ഷം ആരംഭിക്കുക. പരമാവധി എടുക്കാവുന്ന ഓവര്‍ഡ്രാഫ്റ്റ് 1,072 കോടിയാണ്. ഈ പരിധി അധികരിച്ചാല്‍ അഞ്ചുദിവസത്തിനുള്ളില്‍ റിസര്‍വ് ബാങ്കില്‍ വായ്പ തിരിച്ചടച്ച് ഓവര്‍ഡ്രാഫ്റ്റിന് പുറത്തുകടക്കണം.

ഇത് ഏറെക്കുറെ അസാധ്യമാണെന്ന് ധനവകുപ്പ് തയ്യാറാക്കിയ അവലോകനക്കുറിപ്പുതന്നെ പറയുന്നു; ഏപ്രില്‍മാസത്തില്‍ ശമ്പളത്തിനും പെന്‍ഷനും മറ്റ് അനിവാര്യചെലവുകള്‍ക്കും പണമുണ്ടാവില്ല. അതുകൊണ്ട് 2015 ഏപ്രിലില്‍ സാധാരണഗതിയിലുള്ള ചെലവുകള്‍ മാത്രമുണ്ടായാല്‍പ്പോലും ട്രഷറി ദീര്‍ഘനാള്‍ അടച്ചിടേണ്ടിവരും. എത്ര കിണഞ്ഞുപരിശ്രമിച്ചാലും വര്‍ഷാവസാനത്തെ ഓവര്‍ഡ്രാഫ്റ്റ് കുറയ്ക്കാമെന്നല്ലാതെ ഇല്ലാതാക്കാനാവില്ല. ഇനി ആയിരം കോടി രൂപ വരെ കാഷ് ബാലന്‍സ് ഉണ്ടെങ്കിലും ഏപ്രില്‍ ആദ്യവാരം ട്രഷറി അടച്ചുപൂട്ടേണ്ടിവരും എന്നാണ് ധനവകുപ്പിന്റെ നിഗമനം.

കഴിഞ്ഞവര്‍ഷം സ്ഥിതി ഇത്ര മോശമായിരുന്നില്ല. ഓവര്‍ഡ്രാഫ്റ്റ് ഒഴിവാക്കാന്‍ കഴിഞ്ഞു. മാര്‍ച്ച് മാസത്തില്‍ ശമ്പളവും പെന്‍ഷനുമൊഴികെ മറ്റെല്ലാ ചെലവും നിര്‍ത്തിവെച്ചുകൊണ്ടാണ് പ്രതിസന്ധി അന്ന് മറികടന്നത്. അദ്ഭുതമെന്നു പറയട്ടെ, ബജറ്റില്‍ വകയിരുത്തിയ പണമെല്ലാം ചെലവായതായിട്ടാണ് ഔദ്യോഗികകണക്ക്. ഉദാഹരണത്തിന് പദ്ധതിച്ചെലവെടുക്കാം.

മാര്‍ച്ച് മാസം വരെ പദ്ധതിയുടെ 49 ശതമാനമേ ചെലവാക്കിയുള്ളൂ. ധനകാര്യസ്തംഭനം മൂലം മാര്‍ച്ച് മുഴുവന്‍ ട്രഷറി ഏതാണ്ട് അടഞ്ഞുകിടക്കുകയായിരുന്നു. എന്നിട്ടും മാസം തീര്‍ന്നപ്പോള്‍ 80 ശതമാനം പണം ചെലവാക്കിക്കഴിഞ്ഞുവെന്ന് ഔദ്യോഗിക കണക്ക് ! 90 ശതമാനം ചെലവാക്കിയെന്ന് സി.പി. ജോണിനെപ്പോലുള്ള പ്ലാനിങ് ബോര്‍ഡ് അംഗങ്ങള്‍ ചാനലുകളില്‍ അവകാശപ്പെടുകയും ചെയ്യുന്നു. ഒറ്റമാസംകൊണ്ട് എങ്ങനെ പദ്ധതിയുടെ പകുതിയോളം ചെലവാക്കി? ഈ മായാജാലത്തിന്റെ ഗുട്ടന്‍സ് എന്തെന്ന്, ധനപ്രതിസന്ധിയെക്കുറിച്ച് ധനവകുപ്പ് തയ്യാറാക്കിയ കുറിപ്പ് വായിച്ചപ്പോഴാണ് മനസ്സിലായത്.

കുറിപ്പിലെ ഒരു വാചകം ഇതാ 'ഈ അധികച്ചെലവിന്റെ നല്ലൊരു ശതമാനം സംസ്ഥാനത്തിന്റെ പബ്ലിക് അക്കൗണ്ടിലെ ട്രഷറി സേവിങ്‌സ് ബാങ്ക് അക്കൗണ്ടുകളില്‍ ഡിപ്പാര്‍ട്ടുമെന്റുകള്‍ നിക്ഷേപിച്ചിരിക്കുകയാണ്. ഈ പണം പിന്‍വലിക്കാനുള്ള ശ്രമങ്ങള്‍ ഈ വര്‍ഷം ട്രഷറിയുടെ മേല്‍ സമ്മര്‍ദം വര്‍ധിപ്പിച്ചിരിക്കുന്നു'.

പച്ചമലയാളത്തില്‍ കാര്യം ഇത്രയേ ഉള്ളൂ. പദ്ധതി വെട്ടിച്ചുരുക്കി എന്ന അപഖ്യാതി ഒഴിവാക്കാന്‍, വകയിരുത്തിയ പദ്ധതിപ്പണം മാര്‍ച്ച് മാസത്തില്‍ എല്ലാ ഡിപ്പാര്‍ട്ടുമെന്റുകള്‍ക്കും കൈമാറി. സംസ്ഥാന ഖജനാവിന്റെ കണക്കില്‍ ചെലവായതായി എഴുതിവെച്ചു. എന്നാല്‍, കൊടുക്കാന്‍ ട്രഷറിയില്‍ പണമില്ലായിരുന്നു. അതുകൊണ്ട് എല്ലാ ഡിപ്പാര്‍ട്ടുമെന്റുകളും തങ്ങള്‍ക്ക് കിട്ടിയെന്നുപറയുന്ന പണം കൈയില്‍ വാങ്ങാതെ അപ്പോള്‍ത്തന്നെ ട്രഷറി സേവിങ്‌സ് ബാങ്കില്‍ നിക്ഷേപിച്ചു. അങ്ങനെയാണ് പത്തുപൈസയും ട്രഷറിക്ക് പുറത്തുപോകാതെ ചെലവൊപ്പിച്ചത്. നിക്ഷേപിച്ച പണം തിരിച്ചെടുക്കാന്‍ വകുപ്പുകള്‍ ശ്രമിക്കുകയാണ്. പക്ഷേ, ട്രഷറിയില്‍ ഇപ്പോഴും പണമില്ല. ഇതാണ് ട്രഷറിയുടെ മേലുള്ള ഒരു സമ്മര്‍ദം.

സമ്മര്‍ദം ഒഴിവാക്കാന്‍ ധനവകുപ്പിന്റെ നിര്‍ദേശമെന്തെന്നറിയണോ? ട്രഷറി സേവിങ്‌സ് ബാങ്കില്‍ ഇട്ടിരിക്കുന്ന പണം മുഴുവന്‍ തിരിച്ചുപിടിക്കുക. പണം ഇങ്ങനെ ടി.പി. അക്കൗണ്ടിലിടുന്നത് ധനപരമായ അരാജകത്വമാണെന്നാണ് ഇപ്പോഴത്തെ കണ്ടുപിടിത്തം. ട്രഷറി കണക്കു പുസ്തകത്തില്‍ കൊടുത്തുവെന്നും ഡെപ്പോസിറ്റു ചെയ്തുവെന്നും കണക്കുണ്ടാക്കി ചെലവൊപ്പിക്കുകയായിരുന്നു. യഥാര്‍ഥത്തില്‍ ഒരു രൂപയും ചെലവായിട്ടില്ല. എ.ജി. അംഗീകരിക്കുന്ന കണക്കില്‍ പദ്ധതിപ്പണം ചെലവായി. ഇനി തിരിച്ചുപിടിക്കുമ്പോഴോ, അതെവിടെ ചേര്‍ക്കും? കഴിഞ്ഞദിവസം ഞാന്‍ എ.ജി.യോടുതന്നെ ചോദിച്ചു. മറ്റ് മിസലേനിയസ് വരുമാനമായി കണക്കില്‍ ഉള്‍പ്പെടുത്തുമെന്നായിരുന്നു മറുപടി. അപ്പോള്‍ ചെലവായി എന്ന് പ്രസിദ്ധീകരിച്ച കണക്കോ? ഫിനാന്‍സ് അക്കൗണ്ട് പുസ്തകത്തില്‍ അത് ബ്രാക്കറ്റില്‍ കൊടുക്കുമത്രേ. ഇതൊക്കെ ആരാണ് പരതിനോക്കുന്നത്? സാമ്പത്തിക പ്രതിസന്ധി ഇത്രയേറെയുണ്ടായിട്ടും പദ്ധതിപ്പണം ചെലവാക്കിയെന്ന് ഭരണക്കാര്‍ക്ക് മേനിനടിക്കാം. അപാര ബുദ്ധിതന്നെ. ഈ നാടകം ഇത്തവണയും അതേപടി ആവര്‍ത്തിക്കാനാവില്ല. അതുകൊണ്ട് വരുമാനം വര്‍ധിപ്പിക്കണം. പുതിയ നികുതിനിര്‍ദേശങ്ങളുടെ ന്യായാന്യായങ്ങള്‍ ഏറെ ചര്‍ച്ചചെയ്തതാണ്. അതിനിയും ആവര്‍ത്തിക്കുന്നില്ല. ഒറ്റച്ചോദ്യം മാത്രം. കുടിശ്ശിക കിടക്കുന്ന നികുതി പിരിച്ചിട്ടുപോരേ, പുതിയത് പിരിക്കാനിറങ്ങുന്നത്? നികുതിക്കുടിശ്ശികയുടെ കണക്ക് അതിശയോക്തിപരമാണ് എന്നാണ് മുഖ്യമന്ത്രിയുടെ വാദം. ബജറ്റില്‍ കണക്കെഴുതിയപ്പോള്‍ ലക്ഷത്തിന് പകരം കോടിയായി എഴുതിപ്പോയതാണ്, കോടതിയുടെയും സര്‍ക്കാറിന്റെയുമെല്ലാം സ്റ്റേ കഴിഞ്ഞാല്‍ വളരെ തുച്ഛമായ തുകയേ പിരിക്കാനുള്ളൂ എന്നൊക്കെയാണ് അദ്ദേഹം പറയുന്നത്!

കഴിഞ്ഞ നിയമസഭാ സമ്മേളനത്തിന്റെ അവസാനം ഞങ്ങള്‍ക്ക് വിതരണം ചെയ്ത സി.എ.ജി.യുടെ 2014ലെ ഏഴാം റിപ്പോര്‍ട്ട് മുഖ്യമന്ത്രിക്ക് ഓര്‍മയുണ്ടോ, ആവോ? അതില്‍, കോടതിയുടെയോ സര്‍ക്കാറിന്റെയോ സ്റ്റേയില്ലാത്ത പിരിക്കാവുന്ന പന്തീരായിരം കോടി രൂപയുടെ കണക്കുകൊടുത്തിട്ടുണ്ട്. 2008'09 മുതല്‍ 2012'13 വരെ ഓരോ കച്ചവടക്കാരനും വെട്ടിച്ച നികുതിയുടെ കണക്കും പെനാല്‍ട്ടിയും സെക്യൂരിറ്റി ഡെപ്പോസിറ്റുമെല്ലാം സി.ഡി.യിലാക്കി കഴിഞ്ഞ മാര്‍ച്ചുമാസത്തില്‍ സര്‍ക്കാറിന് നല്‍കിയതാണ്. ബന്ധപ്പെട്ട നികുതിക്കണക്കുകള്‍ പുനഃപരിശോധിച്ചാല്‍ ഈ കുടിശ്ശിക പിരിക്കാം. ഒരു നിയമതടസ്സവുമില്ല. ഇതുചെയ്യാതെയാണ് ജനങ്ങളെ പിഴിയാനിറങ്ങുന്നത്. എങ്ങനെയാണ് സി.എ.ജി. ഇത് കണ്ടുപിടിച്ചത്? മറ്റൊരു സംസ്ഥാനത്തിനുമില്ലാത്ത ഒരു പ്രത്യേകത കേരളത്തിനുണ്ട്. രജിസ്‌ട്രേഷന്‍, ചെക്‌പോസ്റ്റുകളിലൂടെ വരുന്ന ചരക്കുകളുടെ കണക്കുകള്‍, കച്ചവടക്കാര്‍ സമര്‍പ്പിക്കുന്ന നികുതിറിട്ടേണുകള്‍ തുടങ്ങിയവയെല്ലാം ഇപ്പോള്‍ കമ്പ്യൂട്ടര്‍ മുഖേനെയാണ്. അഞ്ചുവര്‍ഷത്തെ ഈ കണക്കുകളെല്ലാം സി.എ.ജി. നികുതിവകുപ്പില്‍നിന്ന് വാങ്ങി. എന്നിട്ട് അവയിലെ പൊരുത്തക്കേടുകള്‍ കമ്പ്യൂട്ടറിനെക്കൊണ്ടുതന്നെ പരിശോധിപ്പിച്ചു. മുഖ്യമായും താഴെ പറയുന്ന തട്ടിപ്പുകളാണ് എ.ജി. പരിശോധിച്ചത്. ഇത് മഞ്ഞുമലയുടെ അറ്റം മാത്രമാണ്. ഇനിയും പരിശോധിക്കാന്‍ ഏറെ ബാക്കിയുണ്ട്.

1. എല്ലാ വ്യാപാരികളും പാന്‍ കാര്‍ഡ് കാണിച്ച് രജിസ്റ്റര്‍ ചെയ്യണം. വിറ്റുവരുമാനം പത്തുലക്ഷത്തിനു മുകളിലാണെങ്കിലേ നികുതി കൊടുക്കേണ്ടൂ. 60 ലക്ഷത്തില്‍ താഴെയാണെങ്കില്‍ ചെറിയൊരു തുക മാത്രം നികുതിയായി നല്‍കിയാല്‍ മതി. ഒട്ടേറെ കച്ചവടക്കാര്‍ ഒരേ പാന്‍ കാര്‍ഡ് ഉപയോഗിച്ച് പല രജിസ്‌ട്രേഷന്‍ നമ്പറുകളില്‍ കണക്ക് ഹാജരാക്കി വിറ്റുവരുമാനം അറുപതുലക്ഷത്തില്‍ താഴെയാക്കി നികുതി വെട്ടിക്കുന്നു.

2. നാം ഉപയോഗിക്കുന്ന ചരക്കുകളില്‍ 75 ശതമാനത്തിലേറെയും പുറത്തുനിന്നാണ് വരുന്നത്. ചെക്‌പോസ്റ്റുകളില്‍ ഓരോ വ്യാപാരിയുടെയും കണക്ക് ശേഖരിച്ച് കമ്പ്യൂട്ടര്‍ വിവരശേഖരത്തില്‍ ഉള്‍പ്പെടുത്തുന്നുണ്ട്. എന്നാല്‍, ഒട്ടേറെ കച്ചവടക്കാര്‍ തെറ്റായ പിന്‍ നമ്പര്‍ നല്‍കിയാണ് ചരക്കുകള്‍ കൊണ്ടുവരുന്നത്. മറ്റുചിലര്‍ ചെക്‌പോസ്റ്റ് വഴി കൊണ്ടുവന്നു എന്നുപറയുന്ന ചരക്കുകള്‍ അവരുടെ നികുതി റിട്ടേണ്‍ കണക്കില്‍ ഉള്‍ക്കൊള്ളിക്കുന്നില്ല. ഇങ്ങനെ പലവിധ തട്ടിപ്പുകള്‍. ചെക്‌പോസ്റ്റ് ക്രമക്കേടുകള്‍ പുനഃപരിശോധിക്കുകയാണെങ്കില്‍ 1,900 കോടി രൂപ നികുതിയും 2,900 കോടി രൂപ പിഴയും 300 കോടി രൂപ സെക്യൂരിറ്റി ഡെപ്പോസിറ്റായും ഈടാക്കാം.

3. വ്യാപാരികള്‍ സമര്‍പ്പിക്കുന്ന റിട്ടേണുകളുടെ 11 ശതമാനം മാത്രമാണ് 2011'12ല്‍ ഉദ്യോഗസ്ഥര്‍ സ്‌ക്രൂട്ട്ണി ചെയ്തത്. കമ്പ്യൂട്ടര്‍ വഴി എ.ജി. ഇവ പുനഃപരിശോധിച്ചപ്പോള്‍ പലരും തെറ്റായ നികുതിനിരക്കിലാണ് കണക്കുകൂട്ടിയത് എന്ന് കണ്ടുപിടിച്ചു. നിയമപരമായിട്ടുള്ള പല ബാധ്യതകളും കണക്കിലെടുക്കാതെയാണ് നികുതി നിര്‍ണയിക്കപ്പെട്ടിട്ടുള്ളത്. പലരും റിട്ടേണുകളേ അടയ്ക്കാറില്ല. ഇത്തരം കേസുകളെല്ലാം റീ ഓപ്പണ്‍ ചെയ്യുകയാണെങ്കില്‍ നികുതിയായി 2,700 കോടി രൂപയും പിഴയായി 4,400 കോടി രൂപയും പിരിച്ചെടുക്കാനാവും.

പ്രത്യക്ഷത്തില്‍ കമ്പ്യൂട്ടര്‍ ഉപയോഗപ്പെടുത്തി കണ്ടെത്താവുന്ന പൊരുത്തക്കേടേ എ.ജി. പരിശോധിച്ചിട്ടുള്ളൂ. ഉദാഹരണത്തിന് ചെക്‌പോസ്റ്റിലൂടെ കൊണ്ടുവന്നു എന്ന് ഡിക്ലയര്‍ ചെയ്തിട്ടുള്ള വ്യാപാരം നികുതി റിട്ടേണ്‍ കണക്കില്‍ ഉള്‍പ്പെടുത്തിയിട്ടുണ്ടോ എന്ന് കമ്പ്യൂട്ടര്‍ പരിശോധനയിലൂടെ കണ്ടെത്തി. അതേസമയം, ചെക്‌പോസ്റ്റില്‍ തെറ്റായ വിവരങ്ങള്‍ നല്‍കി കടത്തിക്കൊണ്ടുവരുന്ന ചരക്കുകളെ കമ്പ്യൂട്ടറിന് കണ്ടുപിടിക്കാനാവില്ലല്ലോ. യഥാര്‍ഥത്തില്‍ ഇതുവഴിയാണ് കൂടുതല്‍ നികുതിപ്പണം ചോരുന്നത്. അതുപോലെത്തന്നെ നികുതി റിട്ടേണിലെ പൊരുത്തക്കേടുകളേ കമ്പ്യൂട്ടറിന് കണ്ടുപിടിക്കാനാവൂ. എന്നാല്‍, വളരെ ആസൂത്രിതമായി പ്രത്യക്ഷത്തില്‍ പൊരുത്തക്കേടില്ലാത്ത കണക്കുകള്‍ സമര്‍പ്പിച്ച് നികുതിവെട്ടിക്കാന്‍ കഴിയും. ഉദാഹരണത്തിന് ഒരു കച്ചവടക്കാരന്‍ എല്ലാ വര്‍ഷവും താന്‍ വാങ്ങിയ ചരക്കുകളുടെ കണക്ക് ഊതിവീര്‍പ്പിച്ച് അവതരിപ്പിക്കുന്നു എന്നിരിക്കട്ടെ. അതേസമയം, വില്പന കുറച്ചുകാണിക്കാം. സര്‍ക്കാറിന് താന്‍ ചരക്കുകള്‍ വാങ്ങിയപ്പോള്‍ കൊടുത്ത നികുതിയെന്ന് പറഞ്ഞ് ഭീമമായ ഇന്‍പുട്ട് ടാക്‌സ് വാങ്ങിയെടുക്കാം. കമ്പ്യൂട്ടര്‍ പരിശോധിക്കുക, വില്‍ക്കാനായി വാങ്ങിയ ചരക്കുകള്‍ വിറ്റിട്ടില്ലെങ്കില്‍ അത് സ്റ്റോക്കിന്റെ കണക്കിലുണ്ടോ എന്ന് മാത്രമായിരിക്കും. സ്റ്റോക്ക് യഥാര്‍ഥത്തില്‍ കടയിലുണ്ടോയെന്ന് കമ്പ്യൂട്ടറിന് പരിശോധിക്കാനാവില്ലല്ലോ. അതുകൊണ്ടാണ് ഇത് മഞ്ഞുമലയുടെ അരികുമാത്രമാണെന്ന് ഞാന്‍ നേരത്തേ പറഞ്ഞത്. എന്നിട്ടുപോലും എ.ജി.യുടെ പ്രാഥമികകണക്കില്‍ ഏതാണ്ട് 20,000 കോടി രൂപയുടെ നികുതിച്ചോര്‍ച്ചയുണ്ട്. സംശയത്തിന്റെ ആനുകൂല്യം നല്‍കാന്‍ പറ്റുന്നവയൊക്കെ മാറ്റിനിര്‍ത്തി കണക്കുകൂട്ടിയപ്പോഴാണ് അത് 12,000 കോടിയായി കുറഞ്ഞത്.

കേരളത്തിന്റെ ധനപ്രതിസന്ധി പരിഹരിക്കാന്‍ എന്റെ നിര്‍ദേശം ഇതാണ്. പിരിക്കാതെ വിട്ടു എന്ന് എ.ജി. ചൂണ്ടിക്കാണിച്ച നികുതിപിരിച്ച് പിഴയും ഈടാക്കിയാല്‍ ഗണ്യമായ തുക കുടിശ്ശിക ഇനത്തില്‍ കിട്ടും. ഇത്തരമൊരു പരിശോധന നടത്താന്‍ സര്‍ക്കാര്‍ തുനിയുന്നു എന്നറിഞ്ഞാല്‍ത്തന്നെ ഈ വര്‍ഷത്തെ നികുതിവരുമാനം താനേ കൂടും. ഇതൊന്നും ചെയ്യാതെ ജനങ്ങളെ ഇനിയും പിഴിയാനാണ് സര്‍ക്കാര്‍ ശ്രമിക്കുന്നത്.

കേരളം വികസനസ്തംഭനത്തിലേക്ക്, ധനവകുപ്പ് മാപ്പുസാക്ഷി

Dhanavicharam 16 Sep 2014 ചൊവ്വാഴ്ച

താത്കാലികമായ ധനവൈഷമ്യം മാത്രമാണ് കേരളം നേരിടുന്നതെന്ന് മുഖ്യമന്ത്രിയും ധനമന്ത്രിയും എത്ര വാദിച്ചാലും സത്യമതല്ല. ഈ ഓണക്കാലത്ത് ശമ്പളവും പെന്‍ഷനുമല്ലാതുള്ള ഒരു ബില്ലും മാറിയില്ല. ക്ഷേമപ്പെന്‍ഷനുകള്‍ കുടിശ്ശികയായി. പണമില്ലാത്തതുമൂലം മാവേലിസ്റ്റോറുകളും കണ്‍സ്യൂമെര്‍ഫെഡും നോക്കുകുത്തികളായി. എന്നിട്ടും സംസ്ഥാന ഖജനാവില്‍ പണമില്ല. വെയ്‌സ് ആന്‍ഡ് മീന്‍സ് അഡ്വാന്‍സ് ആയി റിസര്‍വ് ബാങ്കില്‍നിന്ന് 535 കോടി കൈവായ്പയെടുത്തു. അതുകൊണ്ടും പ്രശ്‌നം തീര്‍ന്നില്ല. ഓവര്‍ ഡ്രാഫ്റ്റായി പിന്നെയും നൂറോ നൂറ്റമ്പതോ കോടി കൂടി കടമെടുത്തു. 14 പ്രവൃത്തിദിനങ്ങള്‍ക്കുള്ളില്‍ ഈ പണം തിരിച്ചടച്ചില്ലെങ്കില്‍ ട്രഷറി ഇടപാടുകള്‍ റിസര്‍വ് ബാങ്ക് മരവിപ്പിക്കും. അതിനുമുമ്പ് പണം തിരിച്ചടച്ച് സ്തംഭനം ഒഴിവാക്കുമെന്ന് തീര്‍ച്ചയാണ്. പക്ഷേ, പ്രതിസന്ധി തീരില്ല.

യു.ഡി.എഫ്. സര്‍ക്കാര്‍ അധികാരമേറ്റശേഷമുള്ള ബജറ്റുകളില്‍ പ്രതീക്ഷിച്ച റവന്യൂകമ്മിയും യഥാര്‍ഥത്തിലുള്ള റവന്യൂകമ്മിയും താരതമ്യപ്പെടുത്തിയാല്‍ പ്രശ്‌നത്തിന്റെ ആഴം ബോധ്യമാകും. എല്‍.ഡി.എഫ്. സര്‍ക്കാര്‍ അധികാരമൊഴിഞ്ഞ 2010'11ല്‍ റവന്യൂകമ്മി 3,673 കോടി രൂപയായിരുന്നു. സംസ്ഥാന വരുമാനത്തിന്റെ 1.3 ശതമാനം. 2011'12ല്‍ 5,534 കോടിയായിരുന്നു മതിപ്പ്. എ.ജി.യുടെ യഥാര്‍ഥ കണക്കുവന്നപ്പോള്‍ റവന്യൂകമ്മി 8,034 കോടിയായി. പ്രതീക്ഷിച്ചതിനേക്കാള്‍ 2,500 കോടി കൂടുതല്‍. 2012'13ലും ഇതുതന്നെ ആവര്‍ത്തിച്ചു.
റവന്യൂ കമ്മി 3,463 കോടിയായിരിക്കുമെന്ന് ബജറ്റില്‍ പ്രതീക്ഷിച്ചെങ്കിലും അന്തിമ കണക്കിലത് 9,351 കോടിയായി. 5,884 കോടി അധികം. 2013'14ല്‍ സ്ഥിതി കൂടുതല്‍ വഷളായി. 2,261 കോടി റവന്യൂകമ്മി എന്നായിരുന്നു അക്കൊല്ലത്തെ ബജറ്റ് പ്രതീക്ഷ. യഥാര്‍ഥ കണക്കുവന്നപ്പോള്‍ കമ്മി 11,314 കോടിയായി പെരുകി (സംസ്ഥാന വരുമാനത്തിന്റെ 2.8 ശതമാനം). കണക്കുകൂട്ടിയതിനേക്കാള്‍ 9,045 കോടി അധികം. ഈ വര്‍ഷം 7,133 കോടി രൂപ കമ്മിവരുമെന്നാണ് ബജറ്റില്‍ പ്രതീക്ഷിക്കുന്നത്. ആഗസ്ത് വരെയുള്ള കണക്കുകളുടെ സൂചനപ്രകാരം വര്‍ഷാവസാനം കമ്മി 15,000 കോടിയെങ്കിലുമായി ഉയരും.
ഇക്കാരണങ്ങള്‍കൊണ്ടാണ് സംസ്ഥാനം നേരിടുന്നത് ധനപ്രതിസന്ധിയാണ് എന്ന് ഞങ്ങള്‍ വാദിക്കുന്നത്. പ്രഖ്യാപനങ്ങളും യാഥാര്‍ഥ്യങ്ങളും തമ്മിലുള്ള പൊരുത്തക്കേട് അടിക്കടി കൂടുന്നു. 2014'15ല്‍ കമ്മി പൂജ്യമാക്കുമെന്ന് നിയമം പാസാക്കിയവരാണ് യു.ഡി.എഫ്. സര്‍ക്കാര്‍. പക്ഷേ, ഈ വര്‍ഷം കമ്മി സര്‍വകാല റെക്കോഡായിരിക്കും. 3.2 ശതമാനമെങ്കിലുമാകും. ഇത് ധനകാര്യത്തകര്‍ച്ചയുടെ പ്രവണതയാണ്. സംസ്ഥാനത്ത് ധനവൈഷമ്യമാണോ ധനപ്രതിസന്ധിയാണോ എന്ന് ഇനി വായനക്കാര്‍ക്ക് തീരുമാനിക്കാം.

എല്‍.ഡി.എഫ്. കാലത്തും വെയ്‌സ് ആന്‍ഡ് മീന്‍സ് അഡ്വാന്‍സും ഓവര്‍ ഡ്രാഫ്റ്റുമൊക്കെ എടുത്തിട്ടുണ്ട് എന്നൊക്കെ ആശ്വസിക്കാന്‍ ധനമന്ത്രി ശ്രമിക്കുന്നുണ്ട്. ശരിയാണ്. മഴ തോര്‍ന്നാലും മരം പെയ്യുന്നതുപോലെ, എല്‍.ഡി.എഫ്. ഭരണത്തിന്റെ ആദ്യ രണ്ടുവര്‍ഷം ട്രഷറി ഓവര്‍ ഡ്രാഫ്റ്റായിട്ടുണ്ട്. എന്നാല്‍, യു.ഡി.എഫ്. ഭരണകാലത്ത് ശരാശരി ഒരു വര്‍ഷം 180 ദിവസമായിരുന്നു ട്രഷറി ഓവര്‍ ഡ്രാഫ്റ്റ്. എന്നാല്‍, എല്‍.ഡി.എഫ്. ഭരണം രണ്ടുവര്‍ഷം പിന്നിട്ടപ്പോഴേക്കും ഓവര്‍ ഡ്രാഫ്റ്റ് ദിനങ്ങള്‍ ഇല്ലാതായി. എന്തിന്, 2009'10 മുതല്‍ ഒരിക്കലും റിസര്‍വ് ബാങ്കില്‍നിന്ന്് കൈവായ്പപോലും വാങ്ങേണ്ടിവന്നിട്ടില്ല.
എല്‍.ഡി.എഫ്. ഭരണകാലത്തും റവന്യൂകമ്മി ഇല്ലാതാക്കാനായില്ല. പക്ഷേ, യു.ഡി.എഫ്. ഭരണകാലത്ത് ശരാശരി 3.8 ശതമാനമായിരുന്ന റവന്യൂകമ്മി എല്‍.ഡി.എഫ്. 1.96 ശതമാനമാക്കി കുറച്ചു. 2010'11ല്‍ ഇത് 1.33 ശതമാനമായി താഴ്ന്നു. ഈ പ്രവണത തുടര്‍ന്നിരുന്നെങ്കില്‍ ഒന്നോ രണ്ടോ വര്‍ഷത്തിനകം റവന്യൂകമ്മി ഇല്ലാതാകുമായിരുന്നു.

കഴിഞ്ഞ യു.ഡി.എഫ്. ഭരണകാലത്ത് റവന്യൂ കമ്മിയുടെ ശരാശരി വളരെ ഉയര്‍ന്നതാണെങ്കിലും പൊതുവില്‍ കുറഞ്ഞുവരികയായിരുന്നു. എല്‍.ഡി.എഫ്. ഭരണകാലത്ത് ഈ പ്രവണത ശക്തിപ്പെട്ടു. ചുരുക്കത്തില്‍ ഇപ്പോഴത്തെ സര്‍ക്കാറിന് മുമ്പുള്ള പത്തുവര്‍ഷക്കാലം ഏറ്റക്കുറച്ചിലുണ്ടെങ്കിലും സാമ്പത്തിക സന്തുലിതാവസ്ഥ മെച്ചപ്പെട്ടുവരികയായിരുന്നു. റവന്യൂ ചെലവുകള്‍ ഞെരുക്കിയാണ് എ.കെ. ആന്റണി കമ്മി കുറയ്ക്കാന്‍ ശ്രമിച്ചതെങ്കില്‍ റവന്യൂവരുമാനം വര്‍ധിപ്പിച്ചുകൊണ്ട് എല്‍.ഡി.എഫ്. ആ ലക്ഷ്യത്തിലേക്കെത്തി. യു.ഡി.എഫ്. കാലത്ത് റവന്യൂ വരുമാനം 11 ശതമാനം വീതം പ്രതിവര്‍ഷം ഉയര്‍ന്നപ്പോള്‍ എല്‍.ഡി.എഫ്. ഭരണകാലത്ത് വളര്‍ച്ച 16 ശതമാനം വീതമായിരുന്നു. റവന്യൂചെലവ്, യു.ഡി.എഫ്. കാലത്ത് എട്ട് ശതമാനം വീതം ഉയര്‍ന്നപ്പോള്‍ എല്‍.ഡി.എഫ്. കാലത്ത് 13 ശതമാനം വീതം ഉയര്‍ന്നു. ഇപ്പോഴും ചെലവുകള്‍ കുത്തനെ ഉയരുന്നു. വരുമാനമൊട്ട് കൂടുന്നുമില്ല. ഫലമോ സംസ്ഥാനം ഗുരുതരമായ ധനപ്രതിസന്ധിയിലേക്ക് വീണിരിക്കുന്നു.

മന്ദഗതിയിലുള്ള നികുതിപിരിവാണ് റവന്യൂ വരുമാനത്തിന്റെ മുരടിപ്പിന് കാരണം. കഴിഞ്ഞവര്‍ഷം 24 ശതമാനം നികുതിപിരിവ് വര്‍ധിക്കുമെന്നാണ് ബജറ്റില്‍ കണക്കാക്കിയിരുന്നത്. പക്ഷേ, നേടിയത് 12 ശതമാനം മാത്രം. കഴിഞ്ഞവര്‍ഷം പിരിച്ച നികുതിയേക്കാള്‍ 30 ശതമാനം കൂടുതല്‍ നടപ്പുവര്‍ഷത്തില്‍ പിരിച്ചാലേ ബജറ്റ് ലക്ഷ്യത്തിലെത്തൂ. പക്ഷേ, ഏപ്രില്‍ മുതല്‍ ജൂലായ് വരെയുള്ള നാലുമാസത്തെ അക്കൗണ്ടന്റ് ജനറലിന്റെ കണക്കുകള്‍ പ്രകാരം മൊത്തം നികുതിവരുമാനത്തിലെ വര്‍ധന 9.7 ശതമാനമാണ്. ലക്ഷ്യമിട്ടതിന്റെ മൂന്നിലൊന്ന് മാത്രം. നികുതിവരുമാനത്തിലെ ഇടിവിന് കാരണം ബാറുകള്‍ പൂട്ടിയതല്ല എന്ന് വ്യക്തം. 2013'14ല്‍ ഈ കാലയളവില്‍ 620 കോടി എക്‌സൈസ് നികുതി ലഭിച്ച സ്ഥാനത്ത് നടപ്പുവര്‍ഷം കിട്ടിയത് 660 കോടി.
വാറ്റ് നികുതി നിരക്കുകള്‍ ശരാശരി ഏതാണ്ട് 20 ശതമാനമാണ് യു.ഡി.എഫ്. ഉയര്‍ത്തിയത്. എല്ലാ ബജറ്റിലും മദ്യത്തിന്റെ നികുതി കൂട്ടി. കഴിഞ്ഞ ബജറ്റില്‍ തുണിക്കും നികുതി ഏര്‍പ്പെടുത്തി. എന്നിട്ടും നികുതിപിരിവ് മന്ദഗതിയിലാകുന്നത് എന്തുകൊണ്ട്? ഇന്ത്യയിലെ സാമ്പത്തികമുരടിപ്പാണ് കാരണം എന്ന വിശദീകരണമൊന്നും അംഗീകരിക്കാനാവില്ല. കാരണം ഗള്‍ഫ് പണവരുമാനത്തെ അടിസ്ഥാനമാക്കിയാണ് കേരളത്തിലെ ഉപഭോഗം. അത് കഴിഞ്ഞവര്‍ഷം 90,000 കോടി രൂപ കവിഞ്ഞ് സര്‍വകാല റെക്കോഡിലാണ്. അപ്പോള്‍പ്പിന്നെ നികുതിവരുമാനം ഇടിയുന്നതിന് കാരണം കെടുകാര്യസ്ഥതയും അഴിമതിയും മൂലമുള്ള നികുതിച്ചോര്‍ച്ചയാണെന്ന് വ്യക്തം.

കേരളത്തിലുപയോഗിക്കുന്ന ചരക്കുകളുടെ 85 ശതമാനവും സംസ്ഥാനത്തിന് പുറത്തുനിന്നാണ് വരുന്നത്. ഓരോ കച്ചവടക്കാരനും കേരളത്തിലേക്ക് കൊണ്ടുവരുന്ന ചരക്കുകളുടെ കണക്ക് ചെക്‌പോസ്റ്റില്‍ വെച്ചുതന്നെ തിട്ടപ്പെടുത്തിയാല്‍ പിന്നെ വെട്ടിപ്പ് അസാധ്യമാകും. അതുകൊണ്ട് ചെക്‌പോസ്റ്റുകളെ അഴിമതിവിമുക്തമാക്കുന്നതിനുവേണ്ടി ഒരു യജ്ഞംതന്നെ കഴിഞ്ഞ സര്‍ക്കാറിന്റെ കാലത്ത് നടത്തി. 25,000 രൂപ ഇനാം പ്രഖ്യാപിച്ചിട്ടുപോലും പ്രധാനപ്പെട്ട ഒരു ചെക്‌പോസ്റ്റില്‍പ്പോലും അഴിമതി കണ്ടുപിടിക്കാന്‍ ആര്‍ക്കുമായില്ല. എന്നാല്‍, ഇന്ന് എല്ലാം തലകീഴായിരിക്കുന്നു.
നികുതിഭരണത്തിന്റെ സര്‍വതലങ്ങളിലും മന്ത്രിയോഫീസ് മുതലുള്ള വിവിധ തട്ടുകളിലെ രാഷ്ട്രീയനേതാക്കള്‍ ഇടപെടുന്നുണ്ട്. ഇതിന് രണ്ട് പ്രത്യാഘാതങ്ങളുണ്ട്. ഒന്ന്, സത്യസന്ധരായ ഉദ്യോഗസ്ഥര്‍ നിഷ്‌ക്രിയരാണ്. രണ്ട്, അല്ലാതുള്ളവര്‍ തങ്ങള്‍ക്കും കൈയിട്ടുവാരാനുള്ള അവസരമായി ഇതുപയോഗിക്കുന്നു. രണ്ടായാലും ഫലം അരാജകത്വം.
വരുമാനം ഉയരാത്തതിന് ഉത്തരം പറയേണ്ടത് ധനമന്ത്രിയാണെങ്കില്‍, ലക്കുംലഗാനുമില്ലാതെ ചെലവുകൂട്ടുന്നതിന്റെ ഉത്തരവാദിത്വം മുഖ്യമന്ത്രിക്കാണ്. തോന്നുംപോലെയാണ് പ്രഖ്യാപനങ്ങള്‍. ബജറ്റും ബജറ്റ് പ്രഖ്യാപനങ്ങളും പ്രഹസനമാണ്. ധനവകുപ്പിന് മാപ്പുസാക്ഷിയുടെ റോള്‍ മാത്രം. പ്ലസ് ടു വിഷയം മാത്രമെടുക്കുക. ഇന്നത്തെ ധനഃസ്ഥിതിയില്‍ പുതിയ സ്‌കൂളുകള്‍ വേണ്ട എന്നായിരുന്നു ധനവകുപ്പും കാബിനറ്റുമെല്ലാം ചര്‍ച്ചചെയ്ത് ആദ്യം തീരുമാനിച്ചത്. നിലവിലുള്ള ക്ലാസുകളില്‍ 20 ശതമാനം സീറ്റുകള്‍ വര്‍ധിപ്പിക്കാനും അത്യാവശ്യത്തിന് പുതിയ ബാച്ചുകള്‍ അനുവദിക്കാനും തീരുമാനിച്ചു.

ആരോട് ആലോചിച്ചാണ് ഈ തീരുമാനം അട്ടിമറിച്ചത്? 141 സ്‌കൂളുകളടക്കം 700 ബാച്ചുകളാണ് പുതുതായി അനുവദിച്ചത്. എന്തെങ്കിലും ചര്‍ച്ചയോ പഠനമോ ആലോചനയോ ഇക്കാര്യത്തിലുണ്ടായോ? തീരുമാനത്തിന്റെ ഉത്തരവാദിത്വം ആര്‍ക്ക്? കോടതി കഴുത്തിന് പിടിച്ചപ്പോള്‍ പുതിയ തമാശ. അടുത്തവര്‍ഷം മുതല്‍ അര്‍ഹതയുള്ള എല്ലാ സ്‌കൂളിനും പ്ലസ് ടു ബാച്ച് അനുവദിക്കുമെന്ന് മുഖ്യമന്ത്രി വക പ്രഖ്യാപനം. ഇങ്ങനെയാണ് നയങ്ങള്‍ രൂപവത്കരിക്കുന്നത്. ഇത്രയും വലിയ ചെലവ് വഹിക്കാന്‍ സര്‍ക്കാറിന് കഴിയുമോ എന്നൊന്നും ആലോചനപോലുമില്ല.
ഈ മാസം ഓവര്‍ ഡ്രാഫ്റ്റില്‍നിന്ന് കരകയറിയാലും ഇനിയുള്ള മാസങ്ങളിലും സ്ഥിതി ഇതുതന്നെയായിരിക്കും. 17,000 കോടി രൂപയുടെ പദ്ധതിയില്‍ ആഗസ്ത് വരെ ചെലവാക്കിയത് 5.49 ശതമാനം മാത്രമാണ്. അനുവദിച്ച വായ്പയുടെ പകുതി (ഏതാണ്ട് 7,000 കോടി) ഇതിനകം എടുത്തുകഴിഞ്ഞു. 2014'15ല്‍ റവന്യൂകമ്മി പൂജ്യമാക്കണമെന്ന നിയമം പാലിക്കണമെങ്കില്‍ വായ്പയെടുത്ത തുക മുഴുവന്‍ മൂലധനച്ചെലവിനേ ഉപയോഗിക്കാവൂ. നടപ്പുവര്‍ഷത്തില്‍ 7,000 കോടി രൂപ വായ്പയെടുത്തപ്പോള്‍ ഇതുവരെ പദ്ധതിയില്‍ മൂലധനച്ചെലവിന് കഷ്ടിച്ച് 300 കോടിയേ ചെലവാക്കിയിട്ടുള്ളൂ. കോണ്‍ട്രാക്ടര്‍മാരുടെ ബില്ലുകള്‍ പെരുകുന്നതില്‍ അദ്ഭുതമുണ്ടോ? പശ്ചാത്തലസൗകര്യങ്ങള്‍ സൃഷ്ടിക്കുന്നതില്‍നിന്ന് പിന്മാറിയിട്ട് എത്ര എമര്‍ജിങ് കേരളയോ യെസ് കേരളയോ നടത്തിയിട്ടും ഒരു കാര്യവുമില്ല. ധനപരമായ അരാജകത്വം കേരളത്തെ വികസനസ്തംഭനത്തിലേക്ക് എത്തിക്കുകയാണ് 

കേരളം വീണ്ടും സാമ്പത്തിക വറുതിയിലേക്ക്

Kerala Kaumudi: Friday, 12 September 2014 


ട്രഷറി സ്തംഭനം, ഓവർഡ്രാഫ്റ്റ് തുടങ്ങിയവ മാദ്ധ്യമ തലക്കെട്ടുകളായിരുന്ന ഒരു കാലമുണ്ടായിരുന്നു. 1998-99 മുതൽ 2007-2008 വരെയുള്ള കാലയളവിൽ ഭൂരിപക്ഷം ദിവസവും ട്രഷറിയിൽ ചെലവിന് പണം തികയാത്ത അവസ്ഥയായിരുന്നു. രണ്ടോ മൂന്നോ മാസം കൂടുമ്പോൾ ഒരു തവണയെങ്കിലും ഓവർഡ്രാഫ്റ്റിലുമാകും, ചില സന്ദർഭങ്ങളിൽ ട്രഷറിയുടെ പ്രവർത്തനം തന്നെ നിറുത്തിവയ്‌ക്കേണ്ടതായും വന്നു. 2007-2008 ഓടെ ഈസ്ഥിതി വിശേഷം ഇല്ലാതായി. ആറു വർഷത്തിനുശേഷം വീണ്ടും ട്രഷറി ഓവർഡ്രാഫ്റ്റ് മാദ്ധ്യമ തലക്കെട്ടായിരിക്കുകയാണ്. എന്താണ് ഓവർഡ്രാഫ്റ്റ്?

സംസ്ഥാന സർക്കാർ ചിലവിനുള്ള പണം മുഖ്യമായും നികുതിയിനത്തിൽ നിന്നും നികുതി ഇതര വരുമാനത്തിൽ നിന്നുമാണ് കണ്ടെത്തുന്നത്. കേന്ദ്ര സഹായവും ഒരു പ്രധാനപ്പെട്ട വരുമാനമാണ്. ഇതു കൊണ്ട് വരുമാനം തികഞ്ഞില്ല എങ്കിൽ വായ്പ എടുക്കാം. എത്ര വായ്പ എടുക്കാമെന്ന് കേന്ദ്ര സർക്കാർ ആണ് നിശ്ചയിക്കുക. ഓരോ മൂന്ന് മാസത്തിലും എത്ര രൂപാ എടുക്കാമെന്ന് കേന്ദ്ര സർക്കാർ നിശ്ചയിക്കാറുണ്ട്. തൻമൂലം ചിലപ്പോൾ വായ്പ എടുത്താലും വരുമാനം തികയാത്ത സ്ഥിതി വന്നേയ്ക്കാം.
സർക്കാരിന്റെ അംഗീകൃത വരുമാനം നിത്യ നിദാന ചെലവിലേക്ക് തികയാതെ വരുമ്പോൾ റിസർവ്വ് ബാങ്കിൽ നിന്നും കൈവായ്പ എടുക്കാം. ഇതിനെയാണ് വെയിസ് ആന്റ് മീൻസ് അഡ്വാൻസ് എന്നു പറയുന്നത്. ഇങ്ങനെയുള്ള താത്കാലിക വായ്പയ്ക്ക് പരിധിയുണ്ട്. ഈ ഓണക്കാലത്ത് ഇത്തരത്തിലുള്ള താത്കാലിക വായ്പ അംഗീകൃത പരിധിയായ 525 കോടി രൂപാ കവിഞ്ഞു. ഈ അധിക വായ്പയ്ക്കാണ് ഓവർഡ്രാഫ്റ്റ് എന്നു പറയുന്നത്. 100 കോടിയിലേറെ രൂപ ഓവർഡ്രാഫ്റ്റ് എടുക്കേണ്ടി വന്നു എന്നാണ് അറിവ്.

ഓവർ ഡ്രാഫ്റ്റ് തുക 14 ദിവസത്തിനുള്ളിൽ തിരിച്ച് അടക്കണം. അല്ലാത്തപക്ഷം റിസർവ്വ് ബാങ്ക് ട്രഷറി പ്രവർത്തനം മരവിപ്പിക്കും. ഇത്തരമൊരു സ്ഥിതിവിശേഷം തത്കാലം ഉണ്ടാകാൻ പോകുന്നില്ല. സംസ്ഥാന സർക്കാരിന് അടുത്ത ദിവസങ്ങളിൽ ലഭിക്കാൻ പോകുന്ന നികുതി വരുമാനവും കമ്പോള വായ്പയും ഉപയോഗിച്ച് ഓവർഡ്രാഫ്റ്റ് തിരിച്ചടക്കാൻ സാധിക്കും. പക്ഷേ ഇതൊരു സൂചനയാണ്. ധനകാര്യ വർഷം അവസാനിക്കും മുമ്പ് ഇതിനെക്കാൾ രൂക്ഷമായ പ്രതിസന്ധികൾ പൊട്ടിപുറപ്പെടും.
ഓവർഡ്രാഫ്റ്റ് പ്രതിസന്ധി പരിഹരിക്കുന്നതിന് വേണ്ടി ട്രഷറിയിൽ ശമ്പളം, പെൻഷൻ, ബില്ലുകൾക്കല്ലാതെ മറ്റെല്ലാത്തിനും കർശനമായ നിയന്ത്രണങ്ങൾ ഏർപ്പെടുത്തേണ്ടി വന്നു. ഇതുമൂലം ക്ഷേമപെൻഷനുകൾ പലതും ഓണക്കാലത്ത് മുടങ്ങി. മാവേലി സ്‌റ്റോറുകൾക്കും കൺസ്യൂമർ സ്‌റ്റോറുകൾക്കും ഫലപ്രദമായി കമ്പോളത്തിൽ ഇടപെടുവാൻ സാധിച്ചില്ല. കോൺട്രാക്ടർമാർക്ക് 9 മാസത്തെ ബില്ലുകൾ കുടിശിഖയാണ്. തന്മൂലം നിർമ്മാണ പ്രവർത്തനം ആകെ സ്തംഭിച്ചിരിക്കുന്നു.
വളരെ പ്രധാനപ്പെട്ട മറ്റൊരു വസ്തുത പദ്ധതി പ്രവർത്തനങ്ങളുടെ സ്തംഭനമാണ്. ഏപ്രിൽ- ആഗസ്റ്റ് മാസത്തിൽ പദ്ധതി അടങ്കലിലുള്ള 4.5% തുക മാത്രമാണ് ചെലവഴിച്ചത്. 50 ലക്ഷത്തിൽ കൂടുതലുള്ള ഒരു ബില്ലും ധനവകുപ്പിന്റെ പ്രത്യേക അനുമതിയില്ലാതെ മാറികൊടുക്കേണ്ട എന്നാണ് ട്രഷറി ജീവനക്കാർക്കുള്ള നിർദ്ദേശം. വികസന പ്രവർത്തനങ്ങൾ മരവിച്ചു.

ഒരു വശത്ത് പദ്ധതി പ്രവർത്തനവും നിർമ്മാണ പ്രവർത്തനവും സ്തംഭനത്തിലാണെങ്കിലും സർക്കാർ ചെലവുകൾ ലക്കും ലഗാനുമില്ലാതെ ഉയരുകയാണ്. ബഡ്ജറ്റിൽ വകയിരുത്തിയിട്ടില്ലാത്ത കാര്യങ്ങൾ ഓരോ ആഴ്ചയിലും മന്ത്രിസഭായോഗങ്ങൾ തീരുമാനങ്ങളെടുത്ത് പ്രഖ്യാപിക്കുകയാണ്. പുതിയ താലൂക്കുകൾ, കോളേജുകൾ, ഹയർ സെക്കൻഡറി സ്‌കൂളുകളൊക്കെ ഉദാഹരണങ്ങളാണ്. ഇതിന് പുറമെ ചോദിക്കുന്നവർക്കൊക്കെ അടുത്ത വർഷം സ്‌കൂൾ നൽകുമെന്നും പ്രഖ്യാപിച്ചിട്ടുണ്ട്.
മറുവശത്താകട്ടെ സർക്കാരിന്റെ റവന്യൂ വരുമാനം പ്രതീക്ഷിച്ചപോലെ ഉയരുന്നില്ല. കഴിഞ്ഞ യു.ഡി.എഫ് സർക്കാരിന്റെ കാലത്ത് നികുതി വരുമാനം 11-12% നിരക്കിലാണ് ഉയർന്നത്. എൽ.ഡി.എഫ് ഭരണകാലത്താകട്ടെ നികുതി വരുമാനം 18-20%  പ്രതിവർഷം വളർന്നു. ഇപ്പോഴത് വീണ്ടും 10-12% ആയി താണിരിക്കുന്നു. കഴിഞ്ഞ വർഷം 24% നികുതി വരുമാനം വർദ്ധിക്കുമെന്ന് കരുതിയാണ് ബഡ്ജറ്റ് തയ്യാറാക്കിയത്. പക്ഷേ നികുതി വർദ്ധിച്ചത് 12% മാത്രമാണ്. നടപ്പ് വർഷത്തിൽ നികുതിവരുമാനം മുൻ വർഷത്തെ അപേക്ഷിച്ച് 30% ഉയരുമെന്ന അനുമാനത്തിലാണ് ബഡ്ജറ്റ് തയ്യാറാക്കിയിട്ടുള്ളത്. എന്നാൽ ഏപ്രിൽ- ജൂലായ് മാസത്തെ വരുമാനത്തിന്റെ കണക്ക് പരിശോധിക്കുമ്പോൾ ഇതുവരെ 10% പോലും വർദ്ധനവ് ഉണ്ടായിട്ടില്ലായെന്ന് കാണുവാൻ കഴിയും. നികുതി വരുമാനത്തിലുണ്ടായ ഇടിവാണ് ഇന്നത്തെ സാമ്പത്തിക പ്രതിസന്ധിയുടെ അടിസ്ഥാന കാരണം.

എന്തുകൊണ്ട് നികുതി വരുമാനം ഉയരുന്നില്ല? മദ്യ വരുമാനം കുറഞ്ഞതു മൂലമാണെന്നാണ് സർക്കാർ പറയുന്നത്. മദ്യ നിരോധനം നടപ്പിലാക്കുന്നതിനുവേണ്ടി സർക്കാരും ജനങ്ങളും സഹിക്കുന്ന ത്യാഗമാണ് സാമ്പത്തിക പ്രതിസന്ധിയെന്നാണ് വ്യാഖ്യാനം. ഇത് ശുദ്ധ അസംബന്ധമാണ്. കാരണം എക്‌സൈസ് നികുതി മാത്രമല്ല വാറ്റ് നികുതിയും വാഹന നികുതിയും സ്റ്റാമ്പ് ഡ്യുട്ടിയുമെല്ലാം കുറഞ്ഞിരിക്കുകയാണ്. ജൂലായ് മാസം വരെയുള്ള നികുതി വരുമാനത്തിന്റെ കണക്ക് അക്കൗണ്ടന്റ് ജനറൽ പ്രസിദ്ധീകരിച്ചിട്ടുണ്ട്. ഇതുപ്രകാരം വാറ്റ് നികുതിയിൽ 12.5% വർദ്ധനയെ ഉണ്ടായിട്ടുള്ളു. വാഹന നികുതിയിൽ വർദ്ധനവേ ഉണ്ടായിട്ടില്ല. സ്റ്റാമ്പ് ഡ്യൂട്ടി ഇനത്തിൽ ഏതാണ്ട്  60 കോടി രൂപയുടെ കുവാണുണ്ടായിട്ടുള്ളത്. അതേ സമയം എക്‌സൈസ് ഡ്യൂട്ടിയിൽ 40 കോടി രൂപയോളം വർദ്ധനവുണ്ടായിട്ടുണ്ട്. ബാറുകൾ എല്ലാം അടച്ചാൽ പ്രതിവർഷം 1800 കോടി രൂപയുടെ നഷ്ടമെന്നാണ് കണക്കാക്കിയിട്ടുള്ളത്. ഇതുവരെ ബാറുകൾ അടച്ചത് മൂലമുള്ള നഷ്ടം 500 കോടി രൂപയിൽ താഴെ മാത്രമേ വരികയുള്ളു. ബാറുകൾ അടച്ചതുമൂലം ബിവറേജസ് കോർപ്പറേഷനിലെ വിൽപ്പനയും കൂടി എന്നോർക്കണം. എക്‌സൈസിൽ നിന്നുള്ള വരുമാനം തന്മൂലം 7% കൂടിയിട്ടുണ്ട്.
നികുതി വരുമാനം കുറയുന്നതിനുള്ള കാരണം ഇന്ത്യയിലെ സാമ്പത്തിക മുരടിപ്പാണെന്ന് പറയാൻ കഴിയില്ല. സാമ്പത്തിക മുരടിപ്പ് മൂലം മറ്റ് സംസ്ഥാനങ്ങളുടെ നികുതി വരുമാനത്തിൽ കുറവുണ്ടായിട്ടുണ്ട്. പക്ഷേ കേരളത്തിന് ഇത് ബാധകമല്ല. കാരണം കേരളത്തിന്റെ ഉപഭോക്തൃ കമ്പോളത്തെ സ്വാധിനിക്കുന്ന നിർണ്ണായക ഘടകം ഗൾഫ് പണ വരുമാനമാണ്. ഇതാകട്ടെ കഴിഞ്ഞ വർഷം റിക്കാർഡ് നിലയിലേക്ക് ഉയരുകയാണുണ്ടായത്.

അപ്പോൾ പിന്നെ നികുതി വരുമാന കുറവിന്റെ കാരണം നികുതി ചോർച്ചയാണ്. കഴിഞ്ഞ എൽ.ഡി.എഫ് സർക്കാർ ഒരിക്കൽപ്പോലും നികുതി നിരക്ക് ഉയർത്തിയില്ല. എന്നാൽ യു.ഡി.എഫ് സർക്കാരാകട്ടെ 4% വാറ്റ് നികുതി 5% ആയി ഉയർത്തി. 25%-ത്തിന്റെ വർദ്ധന. 12.5% വാറ്റ് നികുതി 14.5% ആയി ഉയർത്തി. 16% വർദ്ധനവ്. തുണിക്ക് പോലും നികുതി ഏർപ്പെടുത്തി. എന്നിട്ടും നികുതി വരുമാനം 10% മാത്രമേ ഉയർന്നുള്ളു എന്നത് യു.ഡി.എഫ് ഭരണത്തിലെ കെടുകാര്യസ്ഥതയിലേക്കും അഴിമതിയിലേക്കുമാണ് വിരൽ ചൂണ്ടുന്നത്. യു.ഡി.എഫ് നികുതി ഭരണസംവിധാനത്തെ അഴിമതിക്കുള്ള കറവപ്പശുവായി മാറ്റിയിരിക്കുന്നു.
വരുമാനം ഉണ്ടായിരിക്കുമ്പോൾ ചെലവ് നടത്താൻ കൂടുതൽ കുടുതൽ വായ്പകളെടുത്തേ പറ്റൂ. നടപ്പുവർഷം 14000 കോടി രൂപയാണ് വായ്പയെടുക്കാൻ കേന്ദ്രസർക്കാർ അനുവാദം നൽകിയിട്ടുള്ളത്. ഇതിൽ ഏതാണ്ട് പകുതി 6900 കോടി രൂപാ ഓണത്തോടെ എടുത്തു. വായ്പയെടുത്ത ഈ പണം സർക്കാരിന്റെ ദൈനംദിന ആവശ്യങ്ങൾക്കാണ് ചെലവഴിച്ചത്. ഇതു വരെയുള്ള ആകെ പദ്ധതിചെലവ് 1000 കോടി രൂപയിൽ താഴെ മാത്രമേ വരികയുള്ളു. ഇനിയുള്ള മാസങ്ങളിൽ പദ്ധതിയുടെ 95% ചെലവും നടത്തേണ്ടിയിരിക്കുന്നു. സർക്കാരിന്റെ റവന്യൂ വരുമാനം നിത്യനിദാന ചെലവുകൾക്ക് തികയുന്നില്ല. അപ്പോൾ പദ്ധതി നടപ്പാക്കാൻ പണം എവിടെ നിന്ന് ഉണ്ടാകും? പദ്ധതി ഗണ്യമായി വെട്ടിചുരുക്കുകയല്ലാതെ മറ്റൊരു മാർഗ്ഗവും സംസ്ഥാന സർക്കാരിന്റെ മുന്നിലില്ല.

എങ്ങനെയാണ് മുഖ്യമന്ത്രിക്ക് ഈ സ്ഥിതി വിശേഷത്തെ കേവലം ധനവൈഷമ്യം എന്നു വിശേഷിപ്പിച്ച് തടിയൂരാൻ കഴിയുക? യു.ഡി.എഫ് സർക്കാർ അധികാരത്തിൽ വന്നതിനു ശേഷം റവന്യൂ കമ്മി അടിക്കടി ഉയർന്നു കൊണ്ടിരിക്കുകയാണ്. 2010-2011 ൽ റവന്യൂ കമ്മി 3673 കോടി രൂപയായിരുന്നു. അത് 2013-2014 ആയപ്പോൾ 11314 കോടി രൂപയായും വർദ്ധിച്ചു. സംസ്ഥാന വരുമാനത്തിന്റെ 1.3% ആയിരുന്ന റവന്യു കമ്മി 2.8% ആയി പെരുകി. 2014-15-ൽ റവന്യൂ കമ്മി ഇല്ലാതാക്കുമെന്ന് നിയമം പാസ്സാക്കിയവരാണ് ഇത് ചെയ്തിരിക്കുന്നത്. നടപ്പു വർഷത്തിൽ റവന്യു കമ്മി 14000-15000 കോടി രൂപ വരുമെന്നാണ് എന്റെ കണക്കുകൂട്ടൽ. ചുരുക്കത്തിൽ വായ്പ എടുക്കുന്ന പണം മുഴുവൻ റവന്യൂ ചെലവിനായിരിക്കും ചെലവഴിക്കുന്നത്. കോൺട്രാക്ടർമാർ ജാഗ്രത. ഇനി പുതിയ ഗഡുക്കൾ കിട്ടുക അതീവ ശ്രമകരമായിരിക്കും. ഈ സ്ഥിതി വിശേഷം വ്യവസായവൽക്കരണത്തിന് അനിവാര്യമായ പശ്ചാത്തല സൗകര്യ നിക്ഷേപത്തെ പ്രതികൂലമായി ബാധിക്കും. അങ്ങനെ ധനപരമായ അരാജകത്വവും പ്രതിസന്ധിയും കേരളത്തിന്റെ വികസനത്തിന് ഒരു വിലങ്ങുതടിയായി മാറിയിരിക്കുന്നു.
ഇനി വായനക്കാർ തന്നെ നിശ്ചയിക്കുക കേരളം ഇന്ന് അഭിമുഖീകരിക്കുന്നത് കേവലം ധനഞെരുക്കമാണോ അതോ ധനപ്രതിസന്ധിയാണോ?

ട്രഷറി അടച്ചുപൂട്ടലില്‍ വീണ്ടുമെത്തുമോ?

ധനവിചാരം, Mathrubhumi 22, Oct 13


റവന്യൂ വരുമാനം ഏതാണ്ട് 20 ശതമാനംവെച്ച് ഉയരുക. ഈ വരുമാനത്തില്‍ നിത്യനിദാനച്ചെലവുകള്‍ ഒതുക്കുക. പരമാവധി വായ്പയെടുത്ത് റോഡ്, പാലം, തുറമുഖം, വ്യവസായ പാര്‍ക്കുകള്‍ തുടങ്ങിയ പശ്ചാത്തലസൗകര്യങ്ങള്‍ ഒരുക്കുക. ഇതാണ് സര്‍ക്കാറിന്റെ ധനകാര്യ സുസ്ഥിരതയ്ക്കും നാടിന്റെ വികസനത്തിനും ഉതകുന്ന ധനകാര്യ നയം.

എന്നാല്‍, ഇന്ന് മേല്‍പ്പറഞ്ഞ പ്രമാണത്തിന് വിപരീതമായിട്ടാണ് കാര്യങ്ങള്‍ നടക്കുന്നത്. 22 ശതമാനം വരുമാനം വളരുമെന്ന് പ്രതീക്ഷിച്ച സ്ഥാനത്ത് ആദ്യ ആറുമാസം, മുന്‍വര്‍ഷത്തെ അപേക്ഷിച്ച് 11 ശതമാനമേ ഉയര്‍ന്നുള്ളൂ. ചെലവാണെങ്കില്‍ 20 ശതമാനം ഉയര്‍ന്നു. കടം വാങ്ങിച്ചാണ് സര്‍ക്കാറിന്റെ ദൈനംദിന ചെലവുകള്‍ നടത്തിയത്. ഇത് പ്രതിസന്ധിയിലേക്കുള്ള പാതയാണ്.

സംസ്ഥാനസര്‍ക്കാര്‍ കടംവാങ്ങുന്നതിന് കേന്ദ്രസര്‍ക്കാറിന്റെ അനുവാദം വേണം. കേന്ദ്രം ഈ വര്‍ഷം അനുവദിച്ചിട്ടുള്ളത് 12,000 കോടി രൂപയുടെ വായ്പയാണ്. ഇതില്‍ 7000 കോടി രൂപയുടെ വായ്പ ഇതിനകം എടുത്തുകഴിഞ്ഞു. 17,000 കോടി രൂപയുടെ വാര്‍ഷിക പദ്ധതിയുടെ 22 ശതമാനമേ ചെലവായിട്ടുള്ളൂ. പദ്ധതിച്ചെലവിന്റെ സിംഹഭാഗവും വായ്പവരുമാനത്തില്‍നിന്നാണ് കണ്ടെത്തേണ്ടത്. 1,30,000 കോടി രൂപയുടെ പദ്ധതിച്ചെലവിന് ഇനി വായ്പയായി വിഭവസമാഹരണം നടത്താന്‍ കഴിയുക കേവലം 5000 കോടി രൂപ മാത്രമാണ്.

2011 മാര്‍ച്ച് 31-ന് 3881 കോടി രൂപ ട്രഷറിയില്‍ മിച്ചമുണ്ടായ സ്ഥാനത്ത് ഇന്നിപ്പോള്‍ ദൈനംദിനച്ചെലവിന് റിസര്‍വ്ബാങ്കില്‍നിന്ന് കൈവായ്പയെടുക്കേണ്ട ഗതികേടിലായിട്ടുണ്ട്.

സര്‍ക്കാറിന്റെ എല്ലാ വരുമാനവും ട്രഷറിയിലാണ് എത്തുക. അവിടെനിന്നുവേണം നിയമസഭ അംഗീകരിച്ച ബജറ്റ് അനുസരിച്ച് ഓരോ ചെലവും നടത്താന്‍. കടമെടുത്തിട്ടും ട്രഷറിയില്‍ ചെലവിനുള്ള പണം ഇല്ലാതായാല്‍ എന്തുചെയ്യും? ഏതെങ്കിലും ഒരു ദിവസം പ്രതീക്ഷിച്ച വരുമാനം വന്നില്ല. അല്ലെങ്കില്‍ അപ്രതീക്ഷിതമായ ചെലവുണ്ടായി. ഇങ്ങനെ ട്രഷറിയിലുള്ള പണം ചെലവിന് തികയാതെവന്നാല്‍ റിസര്‍വ് ബാങ്കില്‍നിന്ന് കൈവായ്പ, അഥവ 'വെയ്‌സ് ആന്‍ഡ് മീന്‍സ് അഡ്വാന്‍സ്' വാങ്ങാം. ഏതാനും ദിവസത്തിനുള്ളില്‍ ഇത് തിരിച്ചുനല്‍കുകയും വേണം. പരമാവധി 385 കോടി രൂപയാണിപ്പോള്‍ ഇങ്ങനെ വാങ്ങാന്‍ കഴിയുക. കഴിഞ്ഞ നാലുവര്‍ഷം നമ്മള്‍ക്ക് ഒരിക്കല്‍പോലും ഇങ്ങനെ കൈവായ്പയെടുക്കേണ്ടിവന്നിട്ടില്ല. എന്നാല്‍, കഴിഞ്ഞമാസം നമ്മള്‍ 160 കോടി രൂപ വെയ്‌സ് ആന്‍ഡ് മീന്‍സ് അഡ്വാന്‍സിലായി.

ആദ്യമാസങ്ങളില്‍ത്തന്നെ അനുവദനീയമായ വായ്പയുടെ 55 ശതമാനത്തിലേറെ കടമെടുത്തതുകൊണ്ടാണ് നമ്മള്‍ വെയ്‌സ് ആന്‍ഡ് മീന്‍സ് പരിധിക്കുള്ളില്‍ നില്‍ക്കാന്‍ കഴിഞ്ഞത്. 385 കോടി രൂപയേക്കാള്‍ കൂടുതല്‍ റിസര്‍വ് ബാങ്കില്‍നിന്ന് വായ്പയെടുക്കുമ്പോഴാണ് ട്രഷറി ഓവര്‍ഡ്രാഫ്റ്റിലാകുന്നത്.

കഴിഞ്ഞ ആറുവര്‍ഷമായി കേരളം ഓവര്‍ഡ്രാഫ്റ്റിലായിട്ടില്ല. വരുംമാസങ്ങളില്‍ എടുക്കാവുന്ന വായ്പ ശുഷ്‌കിക്കുന്നതോടെ നമ്മള്‍ ഈ പതനത്തിലെത്തുമെന്നത് അനിവാര്യമാണ്.

ഓവര്‍ഡ്രാഫ്റ്റിലായാല്‍ 14 ദിവസംകൊണ്ട് പുറത്തുകടക്കണം. അല്ലെങ്കില്‍ ട്രഷറി പൂട്ടേണ്ടിവരും. ആ സ്ഥിതി ഒഴിവാക്കാന്‍ ഒറ്റ വഴിയേയുള്ളൂ. ചെലവുകള്‍ക്ക് കര്‍ശന നിയന്ത്രണം ഏര്‍പ്പെടുത്തുക. രണ്ടുകോടി രൂപയില്‍ വരുന്ന പദ്ധതിച്ചെലവുകള്‍ക്ക് ധനവകുപ്പിന്റെ മുന്‍കൂര്‍ അനുമതി വേണമെന്ന നിബന്ധന വന്നുകഴിഞ്ഞു. ട്രഷറി പൂട്ടുന്ന സ്ഥിതി ഒഴിവാക്കാനാകും എന്നത് ശരിതന്നെ. പക്ഷേ, കോണ്‍ട്രാക്ടര്‍മാരുടെ ബില്ലുകളും ക്ഷേമപെന്‍ഷനുകളും കുടിശ്ശികയാകും. ചെലവുകള്‍ക്ക് കര്‍ശനമായ കടിഞ്ഞാണ്‍ വീഴും.

ഈ പ്രതിസന്ധിമൂലം അടുത്തവര്‍ഷം ധനകാര്യ കമ്മീഷനില്‍നിന്ന് ലഭിക്കേണ്ടുന്ന ധനസഹായത്തില്‍ ഒരുഭാഗം നഷ്ടപ്പെടാന്‍ പോവുകയാണ്. അടുത്തവര്‍ഷംമുതല്‍ കേരളത്തിന്റെ റവന്യൂ കമ്മി ഇല്ലാതാക്കണമെന്നതാണ് ധനകാര്യ കമ്മീഷന്റെ നിബന്ധന. പക്ഷേ, ഈ വര്‍ഷം റവന്യൂ ചെലവിനായി വലിയ തോതില്‍ വായ്പയെടുക്കേണ്ടിവന്നല്ലോ. റവന്യൂ കമ്മി ഇല്ലാതാവുകയല്ല, മറിച്ച് കുത്തനെ ഉയരുകയാവും ഫലം.

ഇപ്പോഴത്തെ പ്രതിസന്ധി ചെലവുകള്‍ അപ്രതീക്ഷിതമായി ഉയര്‍ന്നതുകൊണ്ടല്ല. നടപ്പുവര്‍ഷത്തിലെ ബജറ്റ്കണക്ക് പ്രകാരം (ധനമന്ത്രിയുടെ പ്രസംഗത്തിലെ അധികച്ചെലവ് അടക്കം) റവന്യൂ ചെലവ് 20 ശതമാനം ഉയരേണ്ടതാണ്. ഈ വര്‍ധനയേ ഇതുവരെ ഉണ്ടായിട്ടുള്ളൂ. ഇപ്പോള്‍ അനുവദിച്ചിട്ടുള്ള പോസ്റ്റുകളില്‍ നിയമനം നടന്ന്, ശമ്പളം കൊടുക്കേണ്ടിവരുമ്പോള്‍ റവന്യൂ ചെലവ് കുത്തനെ ഉയരുമെന്നത് തീര്‍ച്ചയാണ്. ഇപ്പോള്‍ത്തന്നെ പ്രതിസന്ധിയാണെങ്കില്‍ റവന്യൂ ചെലവ് ബജറ്റ് പരിധിവിട്ട് ഉയര്‍ന്നാലത്തെ സ്ഥിതി ആലോചിച്ചുനോക്കിക്കേ? വീണ്ടുവിചാരമില്ലാതെ അനുവദിച്ച പുതിയ താലൂക്കുകള്‍, വില്ലേജുകള്‍, സ്‌കൂളുകള്‍, കോളേജുകള്‍ തുടങ്ങിയവയും പരസ്യം തുടങ്ങിയവയിലെ അധികച്ചെലവുകളും പുനഃപരിശോധിക്കാന്‍ തയ്യാറായാല്‍ ചെലവ് ബജറ്റ് മതിപ്പുകണക്കില്‍ പിടിച്ചുനിര്‍ത്താം.

ബജറ്റില്‍ പ്രതീക്ഷിച്ചതോതിലേ ഇതുവരെ ചെലവുകള്‍ ഉയര്‍ന്നിട്ടുള്ളൂവെങ്കില്‍ പിന്നെ പ്രതിസന്ധിക്കുകാരണം വരുമാനത്തിലുണ്ടായിട്ടുള്ള ഇടിവാണെന്ന് വരുന്നു. പ്രതീക്ഷിച്ചത്രയും ഇല്ലെങ്കിലും 11 ശതമാനം വരുമാനം ഉയര്‍ന്നസ്ഥിതിക്ക് വരുമാനം ഇടിഞ്ഞെന്നുപറയാന്‍ പാടുണ്ടോ? യഥാര്‍ഥത്തില്‍ വരുമാനത്തില്‍ ഇടിവുതന്നെയാണ് ഉണ്ടായിട്ടുള്ളത്.

സംസ്ഥാനത്തിന്റെ ഏറ്റവും പ്രധാനപ്പെട്ട റവന്യൂ വരുമാനം വാറ്റ് നികുതിയാണ്. 2013 സപ്തംബര്‍ വരെയുള്ള വാറ്റ് നികുതി വരുമാനം 6774 കോടി രൂപയാണ്. 2012-13ല്‍ ഇത് 6164 കോടി രൂപയായിരുന്നു. പക്ഷേ, അന്ന് വാറ്റ് നികുതി നിരക്കുകള്‍ ഒരുശതമാനം, നാലുശതമാനം, 13.5 ശതമാനം എന്നിങ്ങനെയായിരുന്നു. മൊത്തം നികുതിവരുമാനത്തിന്റെ അഞ്ചുശതമാനം ഒരു ശതമാനം നിരക്കില്‍നിന്നും, 25 ശതമാനം നാലുശതമാനം നിരക്കില്‍നിന്നും, 70 ശതമാനം 13.5 ശതമാനം നിരക്കില്‍നിന്നുമാണ് ലഭിക്കുന്നത്. 2013-14ല്‍ നാലുശതമാനം നിരക്ക് അഞ്ചായും 13.5 ശതമാനം നിരക്ക് 14.5 ശതമാനമായും ഉയര്‍ത്തി.

കഴിഞ്ഞ സര്‍ക്കാറിന്റെ കാലത്ത് ഒരിക്കല്‍പോലും വാറ്റ് നികുതി നിരക്കുകള്‍ ഉയര്‍ത്താതെയാണ് ശരാശരി 18 ശതമാനം വാര്‍ഷികവര്‍ധന കൈവരിച്ചത്. അതുകൊണ്ട് നികുതിപിരിവിലെ കാര്യക്ഷമത കണക്കാക്കാന്‍ വര്‍ധിപ്പിച്ച നിരക്കിലല്ല, പഴയ നിരക്കില്‍ത്തന്നെ നികുതി ഈടാക്കിയിരുന്നെങ്കില്‍ എന്തു തുക ലഭിക്കുമെന്ന് കണക്കാക്കണം. 2012-13ല്‍ ഒരു ശതമാനം നിരക്കില്‍ ലഭിച്ച നികുതി അതേനിരക്കിലും അഞ്ചുശതമാനം നിക്കില്‍ ലഭിച്ച നികുതി നാലുശതമാനം നിരക്കിലും 14.5 ശതമാനം നിരക്കില്‍ ലഭിച്ച നികുതി 13.5 ശതമാനം നിരക്കിലും ഞാന്‍ കണക്കാക്കിയപ്പോള്‍ ലഭിച്ച തുക 6108 കോടി രൂപയാണ്. ഇതാവട്ടെ, മുന്‍വര്‍ഷത്തെ അപേക്ഷിച്ച് 56 കോടി രൂപ കുറവാണ്. യാഥാര്‍ഥ്യം പറഞ്ഞാല്‍ കേരളത്തിലെ വാറ്റ് നികുതി വരുമാനത്തില്‍ ഒരുശതമാനം ഇടിവുണ്ടായിരിക്കുന്നു.

ഈ സ്ഥിതിവിശേഷത്തിന് കാരണം സാമ്പത്തിക മാന്ദ്യമാണെന്ന വാദം ശരിയല്ല. ഉത്പാദനമേഖലകളില്‍ മാന്ദ്യമുണ്ടായാലും ഗള്‍ഫില്‍നിന്നുള്ള പണവരുമാനം ഗണ്യമായി ഉയരുകയുണ്ടായി. തന്മൂലം ഉപഭോഗത്തില്‍ വലിയ ഇടിവൊന്നും സംഭവിച്ചിട്ടില്ല. അപ്പോള്‍ നികുതിവരുമാനം കുറയാന്‍ കാരണം നികുതിപിരിവിലെ കെടുകാര്യസ്ഥതയാണെന്ന് വരുന്നു. കഴിഞ്ഞ സര്‍ക്കാറിന്റെ കാലത്ത് ആസൂത്രിതമായ ഇടപെടലുകളിലൂടെ സൃഷ്ടിച്ചെടുത്ത നികുതിഭരണ സംവിധാനം ഇന്ന് തകര്‍ന്നിരിക്കയാണ്. കഴിഞ്ഞ രണ്ടുവര്‍ഷത്തെ നികുതിവരുമാന വര്‍ധന മഴയ്ക്കുശേഷമുള്ള മരംപെയ്യലായിരുന്നുവെന്ന് ഇപ്പോള്‍ തെളിയുന്നു.

മൂന്നാംമുറകളില്ലാതെ ശാസ്ത്രീയമായ കണക്കുപരിശോധനയിലൂടെ നികുതിവെട്ടിപ്പ് തടയാം എന്നതാണ് വാറ്റ് നികുതി സമ്പ്രദായത്തിന്റെ മികവ്. കച്ചവടക്കാരന്‍ ഉപഭോക്താക്കളില്‍നിന്ന് പിരിക്കുന്ന നികുതി മുഴുവന്‍ സര്‍ക്കാറിലേക്ക് ഒടുക്കേണ്ട. അദ്ദേഹം ചരക്കുകള്‍ വാങ്ങിയപ്പോള്‍ കൊടുത്ത നികുതി കഴിച്ച് ശിഷ്ടം നികുതിയായി നല്‍കിയാല്‍ മതിയാകും. അതുകൊണ്ട് ഓരോ വ്യാപാരിയും വാങ്ങിയവയുടെയും വിറ്റവയുടെയും കൃത്യമായ കണക്കുകള്‍ സൂക്ഷിക്കണം. ഒരാളുടെ വില്പന മറ്റൊരാളുടെ വാങ്ങലാണ്. ഇരുവരുടെയും കണക്കുകള്‍ തമ്മിലുള്ള പൊരുത്തക്കേടുകള്‍ കണ്ടുപിടിച്ചാല്‍ നികുതിവെട്ടിപ്പ് തടയാം. ചിലര്‍ വാങ്ങിയത് കൂട്ടിക്കാണിക്കും. വില്പന കുറച്ചുകാണിക്കും. പക്ഷേ, ബാക്കിവരുന്നത് സ്റ്റോക്കില്‍ കാണണമല്ലോ.

സ്റ്റോക്കിന്റെ കണക്കുകളും നികുതിവെട്ടിപ്പ് തടയാന്‍ സഹായിക്കും. ഇതിനൊക്കെ കടകളില്‍ പോകേണ്ട. കേരളത്തില്‍ എല്ലാ കണക്കുകളും കമ്പ്യൂട്ടര്‍വഴി ലഭ്യമാണ്. ഓരോ വ്യാപാരിയുടെ കണക്കും തിരുവനന്തപുരത്തിരുന്ന് പരിശോധിക്കാം.
പക്ഷേ, ഇതിന് കഴിയണമെങ്കില്‍ എല്ലാ വ്യാപാരികളും കണക്കുകള്‍ അഥവാ വാര്‍ഷികറിട്ടേണുകള്‍ സമര്‍പ്പിക്കണം. എന്നാല്‍, 2010-'11 ലെ 1600 കച്ചവടക്കാരും 2011-'12 ലെ 3600 കച്ചവടക്കാരും ഇനിയും വാര്‍ഷിക റിട്ടേണുകള്‍ സമര്‍പ്പിക്കാന്‍ ബാക്കിയുണ്ട്. 2012-'13ലേത് 10,000-ത്തിലേറെ വരും.

ഈ റിട്ടേണുകള്‍ ഓരോന്നും പരിശോധിച്ച് പൊരുത്തക്കേടുകള്‍ കണ്ടുപിടിച്ച് അധികനികുതി ആവശ്യപ്പെടേണ്ടത് ഉദ്യോഗസ്ഥരാണ്. കമ്പ്യൂട്ടര്‍ ഉപയോഗിച്ച് ഈ പരിശോധന എളുപ്പം നടത്താവുന്നതാണ്. എന്നിട്ടും 2010-'11 ലെ 11,000 കച്ചവടക്കാരുടെയും 2011-'12 ലെ 22,000 കച്ചവടക്കാരുടെയും റിട്ടേണ്‍ സ്‌ക്രൂട്ടിനി കുടിശ്ശികയാണ്. 2012-13ലെ റിട്ടേണുകളുടെ സ്‌ക്രൂട്ടിനി തുടങ്ങിയിട്ടേയുള്ളൂ.
സ്ട്രൂട്ടിനി നടത്തുമ്പോള്‍ ഗൗരവമായ പിശകുകള്‍ കണ്ടെത്തുന്ന കടകളില്‍ ഓഡിറ്റ് വിസിറ്റ് നടത്തണം. 2013 സപ്തംബര്‍വരെ 4000 ഓഡിറ്റ് വിസിറ്റിനാണ് ടാര്‍ജറ്റ് നിശ്ചയിച്ചിരുന്നത്. നടന്നതാകട്ടെ 1300 മാത്രം; ലക്ഷ്യത്തിന്റെ മൂന്നിലൊന്ന്.

സ്‌ക്രൂട്ടിനി, ഓഡിറ്റ് വിസിറ്റ്, കട പരിശോധന, വാഹനപരിശോധന, ചെക്‌പോസ്റ്റ് പരിശോധന തുടങ്ങിയവയുടെ അടിസ്ഥാനത്തില്‍ 2013 സപ്തംബര്‍വരെ 400 കോടി രൂപയുടെ അധികനികുതിക്ക് നോട്ടീസ് നല്‍കിയിട്ടുണ്ട്. ഇതില്‍ 350 കോടിരൂപ ഉടന്‍ പിരിക്കാവുന്നതാണ്. എന്നാല്‍, ഈ വര്‍ഷം ഇതുവരെ പിരിച്ച അധികനികുതി കേവലം 35 കോടിരൂപ മാത്രം!

കേരളത്തെ സംബന്ധിച്ച് നികുതി പിരിക്കാന്‍ മറ്റൊരു സൗകര്യംകൂടിയുണ്ട്. നികുതിക്ക് വിധേയമായ 80-85 ശതമാനം ഉത്പന്നങ്ങളും ചെക്‌പോസ്റ്റുകള്‍ വഴി കടന്നുവേണം കേരളത്തിലേക്ക് വരാന്‍. ഓരോ വ്യാപാരിയും ഇപ്രകാരം കൊണ്ടുവരുന്ന ചരക്കുകള്‍ ശേഖരിച്ചാല്‍ വാര്‍ഷികറിട്ടേണുകളുടെ നിജസ്ഥിതി വിലയിരുത്തുക വളരെ എളുപ്പമാകും. എന്നാല്‍, ചെക്‌പോസ്റ്റുകളില്‍ അഴിമതിയും അരാജകത്വവും തിരിച്ചുവന്നിരിക്കുന്നു. ചെക്‌പോസ്റ്റുകളില്‍ ഈടാക്കുന്ന നികുതി ഇടിഞ്ഞു. ഇതിലേറെ ഇവിടെ നിന്നുള്ള കണക്കുശേഖരണം കൃത്യമായി നടക്കുന്നില്ല.

മദ്യപാനശീലം കുറഞ്ഞതുകൊണ്ടല്ല മദ്യത്തിന്റെ വില്പനനികുതിയില്‍ ഇടിവുണ്ടായിട്ടുള്ളത്. ബിവറേജസില്‍നിന്നുള്ള നികുതി താഴുമ്പോള്‍ ബാറുകളില്‍നിന്നുള്ള നികുതി ഉയരുകയാണ്. സ്റ്റാമ്പ് ഡ്യൂട്ടിയും ഭാഗാധാരങ്ങളുടെ ഫീസും കുറച്ചപ്പോള്‍ പ്രതിപക്ഷം ചൂണ്ടിക്കാണിച്ചതാണ് രജിസ്‌ട്രേഷന്‍-സ്റ്റാമ്പ് ഡ്യൂട്ടിയില്‍ വലിയ കുറവ് വരുമെന്ന്. ഇപ്പോള്‍ ഈ പ്രവചനം ശരിയായിരിക്കുന്നു. ഈ ഇനത്തിലെ പിരിവ് ലക്ഷ്യത്തിന്റെ പകുതിപോലുമില്ല.

പ്രതിസന്ധി മറികടക്കാന്‍ കൂടുതല്‍ വായ്പയെടുക്കാന്‍ അനുവദിക്കണമെന്ന് കേന്ദ്രസര്‍ക്കാറിനോട് അഭ്യര്‍ഥിച്ചിരിക്കയാണ്. ധനക്കമ്മിയില്‍ ഭ്രാന്തുപിടിച്ചുനില്‍ക്കുന്ന കേന്ദ്ര ധനമന്ത്രി ചിദംബരം കനിയുമെന്ന് തോന്നുന്നില്ല.
കേന്ദ്രം കനിഞ്ഞില്ലെങ്കിലും അത്യാവശ്യം വായ്പയെടുക്കുന്നത് വര്‍ധിപ്പിക്കാന്‍ കേരളത്തിന്റെ കൈയില്‍ ഒരു ഉപായമുണ്ട്- ട്രഷറി സേവിങ്‌സ് ബാങ്ക്. മറ്റൊരു സംസ്ഥാനത്തും ഇത്തരമൊരു സംവിധാനം ഇല്ല. പഴയ തിരുവിതാംകൂര്‍ രാജ്യത്തുണ്ടായിരുന്ന ട്രഷറി സേവിങ്‌സ് ബാങ്ക് ഇന്ത്യാ യൂണിയനില്‍ ലയിച്ചപ്പോള്‍ നിര്‍ത്തലാക്കാന്‍ വിട്ടുപോയി. ട്രഷറി സേവിങ്‌സ് ബാങ്ക് നിര്‍ത്തലാക്കണമെന്ന് റിസര്‍വ് ബാങ്ക് ആവര്‍ത്തിച്ച് ആവശ്യപ്പെടുന്നുണ്ടെങ്കിലും നമ്മള്‍ അതിന് തയ്യാറായില്ല.

കഴിഞ്ഞ സര്‍ക്കാറിന്റെ കാലത്ത് സമഗ്രമായ ട്രഷറി നവീകരണത്തിന് പദ്ധതി തയ്യാറാക്കി. ഇതിന്റെ ഭാഗമായി സമ്പൂര്‍ണ കമ്പ്യൂട്ടറൈസേഷനും ട്രഷറിയുമായി ബന്ധപ്പെടുത്തി എല്ലാ പ്രധാന സര്‍ക്കാര്‍ ഓഫീസുകളിലും എ.ടി.എം. മെഷീനുകളും സ്ഥാപിക്കാന്‍ പരിപാടിയിട്ടു. ഇത് പൂര്‍ത്തീകരിച്ചശേഷം മുഴുവന്‍ ശമ്പളവും പെന്‍ഷനും സേവിങ്‌സ് ബാങ്ക് ട്രഷറി അക്കൗണ്ടുകള്‍വഴി നല്‍കാനായിരുന്നു പരിപാടി. പ്രതിവര്‍ഷം 1000 കോടി രൂപയെങ്കിലും കാഷ് ബാലന്‍സ്, ഇതുവഴി ശമ്പളം, പെന്‍ഷന്‍ എന്നീ ഇനങ്ങളിലായി ചെറിയ പലിശയും ട്രഷറിയില്‍ കിടക്കും എന്നായിരുന്നു പ്രതീക്ഷ. എന്നാല്‍, ഒരു ചര്‍ച്ചയുമില്ലാതെ ശമ്പളവും പെന്‍ഷനും വാണിജ്യബാങ്കുകള്‍വഴി നല്‍കാന്‍ ഉത്തരവിറക്കുകയാണ് ചെയ്തത്. എന്തിന് അര്‍ധസര്‍ക്കാര്‍, സര്‍ക്കാര്‍ ഏജന്‍സികള്‍ അവരുടെ മിച്ചപണം ട്രഷറിയില്‍ നിക്ഷേപിക്കണമെന്ന നിബന്ധനപോലും വേണ്ടെന്നുവെച്ചു. ഫലമോ? 2010-11ല്‍ 2524 കോടിരൂപ ട്രഷറി പബ്ലിക് അക്കൗണ്ടിലൂടെ ബജറ്റിലേക്ക് വന്ന സ്ഥാനത്ത് 2013-'14ല്‍ കേവലം 470 കോടിരൂപയേ ഈ ഇനത്തില്‍ പ്രതീക്ഷിക്കുന്നുള്ളൂ.

പെട്ടെന്ന് ഇനി ട്രഷറി സേവിങ്‌സ് ബാങ്കിലൂടെ പരോക്ഷവായ്പകള്‍ തരപ്പെടുത്തുക പ്രയാസമാണ്. അതുകൊണ്ട് വരുംമാസങ്ങളില്‍ സര്‍ക്കാറിന്റെ ധനപ്രതിസന്ധി കൂടുതല്‍ രൂക്ഷമാകുക അനിവാര്യമാണ്. ട്രഷറി പൂട്ടാതിരിക്കാന്‍ ഒട്ടേറെ സാഹസപ്പെടേണ്ടിവരും .